Description
Ulbmiljoavku: Studeanttat geat máhttet vehá sámegiela ja studeanttat geain lea passiiva giella.
Oahppanvuohki: Nu gohčoduvvon «flipped learning», mas studeanttat lohket ieža ovddalgihtii, ja de deaivvadit hárjehallat ja oahppat čiekŋaleappot dan maid leat lohkan.
Kurssa bistin: 12.1.-15.6.2026 (bassibeivviid ii leat kursa) ja 10.8-7.12.2026. Miessemánus 2026 lágiduvvo lassin fysalaš čoahkkaneapmi Skániin.
Kurssas lágidit 150 diimmu oahpahusa ja lassin ferte rehkenastit geavahit 150 diimmu iehčanas oahpahallamii ovdal deaivvademiid ja daid maŋŋá.
Kursamateriála: Davvin 3 ja Davvin 4 -girjjit, sátnegirjjit ja eará materiála. Go dieđihat kursii, sáhtát seammás diŋgot Davvin-girjjiid (kr 450,- pr st) ja daid CD:id (kr 590,-/st).
Eksámen: Dat geat háliidit sáhttet váldit Saal 2-eksámena privatistan Sámi allaskuvllas. Oahpu áigge mii čállit teavsttaid, ja dain don čohkket máhpa maid sáddet Sámi allaskuvlii. Teavsttaid vuođul lea njálmmálaš eksámen. Kurssas oažžu 15 oahppočuoggá go ceavzá eksámenis. Eksámenii beassan eaktuda, ahte lea oassálastán 80% kursadiimmuin ja ollašuhttán bargogáibádusaid.
Materiálamáksu: kr 2700 ođđajagemánus, máksojuvvo ruovttoluotta giđđat. Dasto 2700 kr čakčamánus, máksojuvvo ruovttoluotta go kursa nohká. Refušuvdna dušše studeanttaide, geat leat registrerejuvvon Norgga ássin.
Eksámenmáksu: kr 2700,- daidda geat váldet eksámena. Máksojuvvo ruovttoluotta kurssa maŋŋá (guoská studeanttaide, geat leat registrerejuvvon Norgga ássin).
Oahpposajit: 12
Dieđiheamit: Sádde (adm@e-skuvla.no) nama, čujuhusa, mobilnummira, personnummira, e-poastačujuhusa ja oanehaš motivašuvdnareivve mas muitalat manin háliidat lohkat sámegiela ja leago dus sámi gullevašvuohta (geahča vuollelis dan birra vel).
Dieđihanáigemearri: Ođđajagemánu 2. b. 2026 jos ozat vuoruhuvvon saji, muđui lea rabas ohcanáigemearri 5.1.2026 buohkaide.
Jos áiggut eksámena váldit, fertet dieđihit eksámenii Studentweb bokte maŋimustá 1.9.2026.
Lohkangelbbolašvuohta / spiehkastat lohkangelbbolašvuođa gáibádusain:
Studeanttain, geat áigot váldit eksámena, gáibiduvvo lohkangelbbolašvuohta, muhto “Forskrift om opptak til høyere utdanning” vuođul gáibádus ii guoskká studeanttaide, geain lea sámi gullevašvuohta:
- sápmelaš gii lea massán giela, ja gii háliida oahppat sámegiela, dahje
- almmolaš ásahusa bargi sámegiel guovllus gii háliida oahppat sámegiela, dahje
- eará (omd. ohcci orru sámi bearrašis dahje sámi guovllus ja háliida oahppat sámegiela)
Kurssa maŋŋá
Kurssa maŋŋá sáhtát joatkit Lohkanbadjeoahpuin, maid Sámi allaskuvla dábálaččat lágida giđđalohkanbajis, dahje individuála oahpahusain E-skuvllas. Máŋga studeantta sáhttet maid ovttas ráhkadit joavkku.
Kurssa ruhtadeaddjit: Kompetanse Norge
Ovttasbargi: Kursa lágiduvvo ovttasbarggus Kárášjoga Sámiid Servviin
Reviews
There are no reviews yet.