SAAL 2 Bergenis – sámegiella praktihkalaš doaimmaid bokte

E-skuvla lágida “SAAL2” ovttasbarggus Birgon ja biras sámiid servviin 2025.

Oahpus deattuhit sámegillii gulahallama ja ovttasbarggu studeanttaid gaskkas. Studeanttat besset hárjehallat hállat sámegiela iešguđetlágan beaivválaš diliin.

Oahpu oassin lea prošeaktabargu, ja oahpu loahpas studeanttat ovdanbuktet prošeaktabarggu njálmmálaččat. Sámegiela álgokurssas juksá Eurohpálaš giellaportfolio A2 dási  ja bargagoahtá B1-dásiin.

Description

Ulbmiljoavku: Studeanttat geat leat váldán Saal 1, dahje Davvin 1 ja 2, dahje sullasaš oahpu.

Oahppanvuohki: Nu gohčoduvvon «flipped learning», mas studeanttat lohket ieža ovddalgihtii, ja de deaivvadit hárjehallat ja oahppat čiekŋaleappot dan maid leat lohkan.

Kursaáiggit: Kursa álgá gaskavahku ođđajagemánu 8. beaivve 2025. Kursa nohká skábman 2025.

Kursa lágiduvvo gaskavahkkoeahkediid 17.30 – 20.30. Dáid gaskavahkuid ii leat kursa: 5.2, 26.2, 16.4. Kurssas leat guokte vahkkoloahpa oahpahus: 8.3-10.3.2025  ja 12.9-14.9.2025. Praktihkalaš barggut sáhttet maid lágiduvvot eará áiggiid.

Kurssas lágidit 160 diimmu oahpahusa. Lassin ferte rehkenastit geavahit 160 diimmu iehčanas oahpahallamii ovdal deaivvademiid ja daid maŋŋá.

Kursabáiki: Bergen inkluderingssenter

Kursamateriála: Davvin 3 ja Davvin 4 -girjjit. Daid E-skuvla diŋgo studeanttaide ođđajagemánu 1. b. 2025. Sáhtát maid ieš diŋgot njuolga Folkeuniversitetetis: nettstudier@fu.no.

Eksámen: Dat geat háliidit sáhttet váldit Saal 2-eksámena privatistan Sámi allaskuvllas. Oahpu áigge mii čállit teavsttaid, ja dain don čohkket 4 teavstta máhppan, maid sáddet Sámi allaskuvlii. Teavsttaid vuođul lea njálmmálaš eksámen. Kurssas oažžu 15 oahppočuoggá go ceavzá eksámenis. Eksámena lágidit nu, ahte dan sáhttá váldit Bergena allaskuvllas Zoom bokte.

Materiálamáksu: kr 2400,- / lohkanbadji. Lassin juohkehaš máksá girjjiid ovddas. Máksojuvvo ruovttoluotta lohkanbaji maŋŋá, jos lea oassálastán 80% oahpahusas.

Daidda geat váldet eksámena: Eksámenmáksu kr 2700,-. Máksojuvvo ruovttoluotta eksámena maŋŋá.

Materiálamáksu, lohkanbadjemáksu ja eksámenmáksu máksojuvvojit ruovttoluotta kurssa maŋŋá (guoská dušše studeanttaide, geat leat registrerejuvvon Norgga ássin).

Oahpposajit: 20

Dieđiheamit: Sádde (adm@e-skuvla.no) nama, čujuhusa, mobilnummira, personnummira, e-poastačujuhusa ja oanehaš motivašuvdnareivve mas muitalat manin háliidat lohkat sámegiela ja jos dus lea sámi gullevašvuohta (geahča vuollelis dan birra vel).

Dieđihanáigemearri: Juovlamánu 21. b. 2024 (jos dárbbašat girjjiid, muđui sáhtát dieđihit gitta 5.1.2025 rádjai).

Jos áiggut eksámena váldit, fertet digitálalaččat dieđihit iežat eksámenii maŋimustá čakčamánu 1. b. 2025. Ávžžuhit dahkat dieđiheami buori áiggis, nu ahte gearggat oaččut veahki, jos mii nu ii doaimma.

Lohkangelbbolašvuohta / spiehkastat lohkangelbbolašvuođa gáibádusain:

Studeanttain, geat áigot váldit eksámena, gáibiduvvo lohkangelbbolašvuohta, muhto “Forskrift om opptak til høyere utdanning” vuođul gáibádus ii guoskká studeanttaide, geain lea sámi gullevašvuohta:

  • sápmelaš gii lea massán giela, ja gii háliida oahppat sámegiela, dahje
  •  almmolaš ásahusa bargi sámegiel guovllus gii háliida oahppat sámegiela, dahje
  •  eará (omd. ohcci orru sámi bearrašis dahje sámi guovllus ja háliida oahppat sámegiela)

Go dieđihat eksámenii, don fertet lástet nehttii motivašuvdnareivve, mas muitalat manin don háliidat lohkat sámegiela, ja mii dáid bajábeale čuoggáin guoská dutnje.

Kurssa maŋŋá

Kurssa maŋŋá sáhtát joatkit Lohkanbadjeoahpuin, maid Sámi allaskuvla dábálaččat lágida giđđalohkanbajis.

Kurssa ruhtadeaddjit: Sámediggi

Ovttasbargi: Birgon ja biras sámiid searvi

Reviews

There are no reviews yet.

Only logged in customers who have purchased this product may leave a review.