Description
Ulbmiljoavku: Studeanttat geat eai máhte sámegiela, dahje geain lea passiiva giella (leat gullan ja áddejit ollu sámegiela, muhto eai olus hála).
Oahppanvuohki: Nu gohčoduvvon «flipped learning», mas studeanttat lohket ieža ovddalgihtii, ja de deaivvadit hárjehallat ja oahppat čiekŋaleappot dan maid leat lohkan.
Kursa álgá: Čakčamánu 2. b. 2022. Kursa nohká geassemánus 2023. Kursa lágiduvvo vuossárggaid/mánnodagaid, gaskavahkuid ja bearjadagaid diibmu 10.30 – 12.15.
Materiálamáksu: Kursa lea nuvttá, studeanta diŋgo ieš girjjiid Davvin 1 ja 2 Folkeuniversitetetis: nettstudier@fu.no. Girjjiid sáhttá maid lohkat nb.no -siiddus.
Eksámen: Dat geat háliidit sáhttet váldit Saal 1 -eksámena privatistan Sámi allaskuvllas. Oahpu áigge studeanttat čállet teavsttaid, ja dain čohkkejit máhpa, maid sáddejit Sámi allaskuvlii (njeallje teavstta, mat leat 1/2 – 1 siiddu guhku). Teavsttaid vuođul lea njálmmálaš eksámen jogo Guovdageainnus (sáhttá maid ohcat beassat váldit Zoom bokte neahtas). Kurssas oažžu 15 oahppočuoggá, go ceavzá eksámenis. Eksámenii beassan eaktuda ahte lea oassálastán 80 % oahpahusas.
Mávssut jos háliidat váldit eksámena: Lohkanbadjemáksu: kr 400,- ja eksámenmáksu kr 2000,- (E-skuvla sádde rehkega).
Lohkanbadjemáksu ja eksámenmáksu máksojuvvojit ruovttoluotta kurssa maŋŋá studeanttaide, geat leat registrerejuvvon Norgga ássin.
Oahpposajit: 10
Dieđiheapmi: Sádde (adm@e-skuvla.no) nama, čujuhusa, mobiilanummira, personnummira, e-poastačujuhusa ja oanehaš motivašuvdnareivve, mas muitalat manin háliidat lohkat sámegiela ja jos dus lea sámi gullevašvuohta (geahča vuollelis dan birra).
Dieđihanáigemearri: Borgemánu 15. b. 2022
Jos áiggut eksámena váldit, fertet deavdit dieđihanskovi ja sáddet dan nu ahte dat lea maŋimustá guovvamánu 1. b. 2023 Sámi Allaskuvllas, Hánnoluohkká 45, 9520 Guovdageaidnu. Atte dieđu kursaoahpaheaddjái, go leat dieđihan eksámenii.
Lohkangelbbolašvuohta / spiehkastat lohkangelbbolašvuođa gáibádusain:
Studeanttain, geat áigot váldit eksámena, gáibiduvvo lohkangelbbolašvuohta, muhto “Forskrift om opptak til høyere utdanning” vuođul gáibádus ii guoskká studeanttaide, geain lea sámi gullevašvuohta:
- sápmelaš gii lea massán giela, ja gii háliida oahppat sámegiela, dahje
- almmolaš ásahusa bargi sámegiel guovllus gii háliida oahppat sámegiela, dahje
- eará (omd. ohcci orru sámi bearrašis dahje sámi guovllus ja háliida oahppat sámegiela)
Kurssa maŋŋá
Kurssa maŋŋá sáhtát joatkit Saal 2 -kurssain, maid E-skuvla lágida 2024 čavčča.
Kurssa ruhtadit: Kompetanse Norge ja Norgga Sámediggi
Ovttasbargi: Kárášjoga Sámiid Searvi
Reviews
There are no reviews yet.